Gaur egungo gerretan umeak dira hildakoen erdia ia. Baina umeak hiltzaile ere badira batzuetan, borroka armatuetan soldadu bihurtzen dituzte eta. Munduan 18 urtetik beherako 300.000 soldadu inguru daude. 1989ko Nazio Batuetako Batzar Orokorrak 15 urtetan finkatu zuen soldadutzarako eta gerrarako gutxieneko adina. Eta, konbentzio horretan babestuta, estatu askok hartzen dituzte adoleszenteak armadarako, besteak beste Estatu Batuek.

Aurtengo urtarrilean Nazio Batuetako aditu-talde batek aztertu zuen gutxieneko adin hori 18 urtetara igotzea. Baina sei estatuk -Estatu Batuek, Britainia Handiak, Israelek, Pakistanek, Hego Koreak eta Kuwaitek- ez zuten ontzat hartu adin hori. Dena den, aurten, azaroaren 20an, Umeen Eskubideen Konbentzioaren 10. urteurrena ospatzen da. Zenbait gobernu eta GKE (Gobernuz Kanpoko Erakunde) jo eta su ari dira aldaketaren aldeko kanpainan. Baliteke egun horretarako aurrerapausoren bat egitea.

Save the Children Gobernuz Kanpoko Erakundea nabarmentzen ari da ume soldaduen kontrako kanpainan. Interneten daukaten webgunetik txosten baten zatia ekarri dugu hona. Hauxe:

Zergatik militar bihurtu umeak?

1. Soldadu heldu gutxi daudelako. Alemaniak Bigarren Munduko Gerratearen amaieran 12 urte eskaseko umeak hartu zituen soldadu.
2. Arma arin asko dagoelako. Garai bateko armak astunak eta erabiltzen zailegiak ziren umeentzat. Oraingo arma arinak, berriz, 10 urtekoentzat ere egokiak dira.
3. Soldadu merkeak dira eta esandakoa betetzen dute. Buruzagi militarrek eta gerrillariek diotenez, hoberenak dira umeak, arauzaleenak, ez dira sekulan oldartzen eta itsu-itsuan betetzen dituzte aginduak.
4. Hiltzekotan hobe umeak hiltzea. Iranen eta Iraken arteko gerratean mina-eremuetan soldadu helduen aurretik bidaltzen zituzten.
5. Beldurrik ez. Arrisku handiko egoeretan, ez dira hainbeste beldurtzen. Bestalde, zaila da ume bat aurrez aurre tirokatzea. Borroka armatu askotan - Peru, Somalia, Irlanda ...- soldaduen aurretik bidali izan dituzte. Izan ere, egoera horretan etsaiak ez daki zer egin ume haiekin: hil ala bizirik utzi.

SOLDADUTZARAKO ETA GERRARAKO GUTXIENEKO ADINA:15 URTE